Lajmet e fundit
Në momentin, kur duhej të fillonte shfaqja e komedisë "Jo të gjithë hajdutët vijnë për të vjedhur", nga trupa teatrore e Tiranës "Edukojmë Art", në Qendrën e Kulturës "Rexhep Mitrovica", u ndal rryma.
Por kjo nuk i ka penguar aktorët nga Shqipëria që të fillojnë shfaqjen e tyre nën dritat e qirinjve të ndezur nga organizatorët e kësaj shfaqje dhe ndriçimit me celularë nga ana e audiencës.
Komedia në fjalë ishte pasqyrim i një realiteti të "hidhur" të lojës së fjalëve dhe ndjenjave, i tradhtive bashkëshortore, ku ishin të implikuar shtresa të ndryshme të shoqërisë, duke nisur nga një zyrtar bashkie (nënkryetari).
Ky i fundit ndonëse i martuar kishte edhe një lidhje jashtëmartesore me një grua, ashtu siç edhe gruaja e tij që kishte të dashur burrin e dashnores së burrit të saj, por që asnjëri nuk e dinin për tjetrin.
Ngjarja fillonte nga një hajdut që kishte hyrë në shtëpinë e nënkryetarit për të vjedhur, por që situata e detyroj të bëhet mburojë e tradhtive bashkëshortore të të tjerëve, ndërkohë që kjo i shkaktoi shumë telashe me gruan e tij.
Kjo shfaqje ishte njëra nga aktivitetet e organizuara nga Drejtoria për Kulturë, e Mitrovicës në kuadër të manifestimit tradicional “Ditët e Diasporës” dhe u pritë mirë nga shikuesit, transmeton Klan Kosova.
