“Jam arrestu e jam liru…”, flet njëri nga të dyshuarit që u prangos sot në Kaçanik, vëllai i ish ushtarit të dyshuar

Policia e Kosovës, në koordinim me Prokurorinë Speciale, zhvilloi sot një aksion në Kaçanik, i cili rezultoi me arrestimin e katër personave të dyshuar si pjesë e grupit “Rinia Islame në Kaçanik”, që dyshohet për shpërndarje të thirrjeve me motive fetare. Në mesin e të ndaluarve ishte edhe Labinot Murati, vëllai i Rilind Muratit – njëri nga të dyshuarit për vrasjen e rreshterit të Policisë, Muhamed Lika. Labinot Murati është liruar pas intervistimit. Në një përgjigje ekskluzive për Klan Kosovën, ai konfirmoi se ishte arrestuar dhe më pas u lirua, por nuk pranoi të jepte më shumë detaje. “S’po du me folë. Jam arrestu e jam liru sot. Jam intervistu – s’po du me folë ma shumë”, deklaroi shkurt Murati. Të njëjtën gjë e konfirmoi edhe babai i tij, Ibush Murati, zyrtar policor në Kaçanik, pas lirimit të të birit. “Ma kanë arrestu edhe djalin tjetër sot. Por para pak minutash më thirri me më tregu që e kanë lëshu. Veç është intervistu,” tha ai për Klan Kosovën. Përveç Labinot Muratit, edhe tre të dyshuarit e tjerë që u arrestuan tashmë janë liruar. Klankosova.tv ka dërguar pyetje në Prokurorinë Speciale dhe në Policinë e Kosovës për të marrë një konfirmim zyrtar, por akoma nuk kanë kthyer përgjigje. https://klankosova.tv/aksioni-i-prokurorise-speciale-shoqerohen-4-persona-dyshohet-se-ishin-pjese-e-grupit-rinia-islame-ne-kacanik/