Lajmet e fundit
Sulmet ajrore izraelite në tre shtëpi në qytetin jugor të Gazës, Rafah, vranë të paktën 25 palestinezë dhe plagosën shumë të tjerë, thanë mjekët të hënën, teksa udhëheqësit e Hamasit shkuan në Kajro për një raund të ri bisedimesh armëpushimi me ndërmjetësuesit egjiptianë dhe ata të Katarit.
Në qytetin e Gazës, në veri të Rripit të Gazës, avionët luftarakë izraelitë goditën dy shtëpi, duke vrarë të paktën katër persona dhe duke plagosur disa njerëz, thanë zyrtarët shëndetësorë. Sulmi në shtëpinë tjetër vrau dy vëllezër, shtuan ata.
Sulmet në Rafah, ku pothuajse gjysma e popullsisë 2.3 milionëshe të Gazës ka kërkuar strehim nga muaj të tërë bombardimesh izraelite, u shpalosën disa orë përpara se Egjipti t'i priste liderët e Hamasit për të diskutuar perspektivat për një marrëveshje armëpushimi me Izraelin.
I pyetur për sulmet ajrore gjatë natës në Rafah, një zëdhënës i ushtrisë izraelite (IDF) tha se avionët luftarakë kishin "goditur objektivat terroriste ku terroristët po vepronin brenda një zone civile në Gazën jugore", duke refuzuar të japë detaje, shkruan Reuters, transmeton Klankosova.tv.
