Lajmet e fundit
Të premten në mëngjes, raketat izraelite goditën zona të ndryshme të Beirutit, përfshirë afër aeroportit ndërkombëtar të kryeqytetit, në një sulm që forcat izraelite e cilësuan si pjesë të fushatës kundër grupit militant Hezbollah, të mbështetur nga Irani. Shpërthimet masive shkaktuan panik dhe dëme të mëdha në disa lagje të qytetit.
Në këtë situatë të tensionuar, kryeministri i përkohshëm libanez, Najib Mikati, pas një takimi me kreun katolik të vendit, bëri thirrje për unitet politik për të zgjedhur një president të ri. Presidenca libaneze ka mbetur vakante që nga tetori 2022, kur përfundoi mandati i Presidentit Michel Aoun, për shkak të mosmarrëveshjeve mes grupeve politike.
"Brenga jonë e përbashkët sot është mënyra se si të përballemi me kërcënimin që rrezikon ekzistencën tonë. Duhet të bashkohemi dhe të zgjedhim një president të konsensusit, sot, jo nesër," deklaroi Mikati.
Nga ana tjetër, Shefi i Shtabit të Izraelit, Gjeneral Lejtnant Herzi Halevi, rikonfirmoi qëllimin e Izraelit për të vazhduar sulmet ndaj infrastrukturës së Hezbollahut, duke theksuar se fushata ushtarake do të shtrihet në të gjitha zonat ku grupi ka baza, përfshirë Beirutin dhe Libanin e Jugut.
Përveç Libanit, sulme ajrore izraelite u kryen edhe në Bregun Perëndimor, ku u raportuan viktima palestineze. Sipas Ministrisë së Shëndetësisë në Gaza, në këto sulme humbën jetën 18 palestinezë.
