Lajmet e fundit
Ministri i Jashtëm izraelit Gideon Saar tha të mërkurën se çdo marrëveshje armëpushimi me Libanin duhet të sigurojë që Izraeli të ketë “lirinë për të vepruar” kundër grupit militant libanez Hezbollah.
“Në çdo marrëveshje që do të arrijmë, do të na duhet të ruajmë lirinë për të vepruar nëse do të ketë shkelje”, tha ai në një takim me ambasadorë të huaj përpara mbërritjes së pritshme të të dërguarit të ShBA-së Amos Hochstein në Izrael për të diskutuar një armëpushim.
“Për fat të keq, Libani është një shtet i dështuar. Por ne nuk mund të paguajmë çmimin në sigurinë tonë, në sigurinë e qytetarëve tanë, për mungesën e sovranitetit të tyre apo lëshimet e sovranitetit”, tha Saar, raporton AFP, transmeton Klankosova.tv.
“Ne do të duhet të jemi në gjendje të veprojmë në kohë, përpara se problemet të rriten”, shtoi ai.
Të mërkurën, Hochstein vuri në dukje po ashtu “përparim shtesë” pas takimit të tij të dytë me kryetarin e parlamentit aleat të Hezbollahut, Nabih Berri, i cili ka udhëhequr përpjekjet e ndërmjetësimit në emër të grupit të mbështetur nga Irani.
Me vizitën e Hochstein në rajon, Saar tha “mund të konkludoni se amerikanët besojnë se një marrëveshje e tillë është e mundur. Gjëja më e rëndësishme për të theksuar është se ne do të donim të arrinim një marrëveshje që do t'i rezistojë kohës”.
Shtetet e Bashkuara, mbështetësi kryesor ushtarak dhe politik i Izraelit, ka bërë presion për rezolutën e Këshillit të Sigurimit të OKB-së që i dha fund luftës së fundit Hezbollah-Izrael në 2006, për të formuar bazën e një armëpushimi të ri.
Sipas Rezolutës 1701, trupat libaneze dhe paqeruajtësit e OKB-së duhet të jenë të vetmet forca të armatosura të dislokuara në Libanin jugor.
Izraeli ka thënë se më shumë se 60,000 njerëz janë larguar nga shtëpitë e tyre në veri që kur Hezbollahu filloi të gjuante raketa në mbështetje të Hamasit pas sulmit të aleatit të tij palestinez më 7 tetor 2023 që shkaktoi luftën në Gaza. /Klankosova.tv
