Izraeli dërgon një delegacion në Katar për të biseduar për Gazën

Një delegacion izraelit u nis për në Katar të dielën për bisedime mbi një marrëveshje të mundshme për pengjet në Gaza dhe armëpushimin, tha një zyrtar izraelit, disa orë përpara se kryeministri Benyamin Netanyahu të shkonte në Uashington për t'u takuar me presidentin e ShBA-së, Donald Trump. Presioni publik po rritet mbi Netanyahun për të siguruar një armëpushim të përhershëm dhe për t'i dhënë fund luftës në Gaza, një veprim i kundërshtuar nga disa anëtarë të linjës së ashpër të koalicionit të tij të krahut të djathtë. Të tjerë, përfshirë ministrin e Jashtëm, Gideon Saar, kanë shprehur mbështetje. Grupi palestinez Hamas tha të premten se i ishte përgjigjur një propozimi për armëpushim në Gaza të mbështetur nga ShBA-ja me një "frymë pozitive", disa ditë pasi Trumpi tha se Izraeli kishte rënë dakord "me kushtet e nevojshme për të finalizuar" një armëpushim 60-ditor. Por në një shenjë të sfidave të mundshme me të cilat përballen ende të dyja palët, një zyrtar palestinez nga një grup militant aleat me Hamasin tha se shqetësimet mbetën në lidhje me ndihmën humanitare, kalimin nëpër pikën kufitare Rafah në Izraelin jugor për në Egjipt dhe qartësinë mbi një orar për tërheqjen e trupave izraelite. Zyra e Netanyahut tha gjithashtu në një deklaratë se ndryshimet e kërkuara nga Hamasi në propozimin e armëpushimit "nuk ishin të pranueshme për Izraelin". Megjithatë, zyra e tij tha se delegacioni do të fluturonte përsëri për në Katar për të "vazhduar përpjekjet për të siguruar kthimin e pengjeve tona bazuar në propozimin e Katarit për të cilin Izraeli ra dakord", shkruan Reuters, transmeton Klankosova.tv.