Iu prezantua si nuse, e më pas ‘vdiq’, skema e mashtrimit që i kushtoi viktimës 2 mijë e 500 euro (VIDEO)

Rasti i Naxhije Ramadanit po merr përmasa gjithnjë e më të mëdha, ndërsa dëshmitë e viktimave zbulojnë një skemë të dyshuar mashtrimi që ka prekur qytetarë brenda dhe jashtë Kosovës.

Përmes një faqeje për lidhje martesore në rrjetet sociale, ajo dyshohet se ka mashtruar persona të ndryshëm, duke u marrë para për premtime të rreme për lidhje serioze apo duke përdorur histori të sajuara për përfitim financiar.

Një nga rastet më të rënda është ai i një 40-vjeçareje nga Gjilani, së cilës i është publikuar fotografia pa leje në një faqe ku pretendohej se kërkonte burrë. Ky publikim ka shkaktuar përçarje në familje dhe përfundimisht ka çuar në prishjen e martesës së saj mbi 20-vjeçare. Sipas saj, përveç dëmit emocional dhe social, është përballur edhe me kërkesa për para dhe kërcënime.

Raste të ngjashme raportohen edhe nga diaspora. Një burrë në Shtetet e Bashkuara është mashtruar përmes historive të rreme për sëmundje dhe vdekje familjare, duke dërguar para për ndihmë. Kur familja e tij ka kërkuar sqarime, situata ka eskaluar në kërcënime dhe publikim të fotografive private.

Ndërkohë, një 50-vjeçar nga Prishtina pretendon se ka humbur rreth 2 mijë e 400 euro, pasi ishte lidhur me këtë agjenci në kërkim të një nuseje. Sipas tij, pagesat janë kërkuar fillimisht për ndërmjetësim, e më pas për situata të sajuara emergjente si sëmundje apo vdekje familjare. Mashtrimi është zbuluar vetëm pasi ai ka tentuar të verifikojë vetë informacionet.

Në një prononcim telefonik, Naxhije Ramadani ka pranuar përfshirjen në mashtrim, por ka deklaruar se ka vepruar nën kërcënim dhe presion, duke lënë të kuptohet se pas kësaj skeme mund të qëndrojnë edhe persona të tjerë.

Rasti ka ngritur shqetësime serioze për mashtrimet online dhe keqpërdorimin e identitetit, ndërsa mbetet të shihet nëse institucionet do të ndërmarrin hapa konkretë për zbardhjen dhe ndëshkimin e kësaj çështjeje.

Për të gjitha informacionet, përfshirë palët e përfshira në këtë çështje, detajet i gjeni në videot e mëposhtme.