Lajmet e fundit
Zëvendësministri i Jashtëm i Iranit, Majid Takht-Ravanchi, ka deklaruar për BBC se Shtetet e Bashkuara duhet të përjashtojnë çdo sulm tjetër ushtarak ndaj Iranit nëse duan të rifillojnë bisedimet diplomatike.
Sipas tij, administrata e presidentit Donald Trump ka shprehur përmes ndërmjetësve dëshirën për të kthyer bisedimet me Iranin, por nuk ka qenë e qartë në lidhje me çështjen kritike të ndërprerjes së sulmeve gjatë procesit të dialogut.
Këto deklarata vijnë pas një vale përshkallëzimi ushtarak midis Izraelit dhe Iranit që shpërtheu më 13 qershor, kur Izraeli nisi një fushatë sulmesh ajrore ndaj objektivave bërthamore dhe ushtarake në Iran. Përplasja zgjati 12 ditë, me SHBA-në që u përfshi direkt duke bombarduar tre qendra bërthamore iraniane: Fordo, Natanz dhe Isfahan, raporton BBC, transmeton Klankosova.tv.
Takht-Ravanchi theksoi se Irani nuk do të heqë dorë nga e drejta për pasurim uraniumi për qëllime paqësore, dhe kritikoi presionin për ndalim të plotë të tij si një formë "të ligjit të xhunglës". Ai tha se çdo marrëveshje e mundshme mund të diskutojë mbi nivelin dhe kapacitetin e pasurimit, por jo heqjen dorë nga kjo e drejtë.
Ndërkohë, Irani ka nisur shkëputjen graduale nga bashkëpunimi me Agjencinë Ndërkombëtare për Energji Atomike (IAEA), duke e akuzuar atë për anësi ndaj SHBA-së dhe Izraelit.
Presidenti Trump ka deklaruar se do të konsiderojë sërish sulme ushtarake ndaj Iranit nëse ka prova që Teherani po afrohet me nivelin e uraniumit të nevojshëm për ndërtimin e një bombe bërthamore.
Aktualisht nuk ka ndonjë datë të caktuar për rifillimin e bisedimeve, dhe Takht-Ravanchi ka kërkuar që SHBA të sqarojë pozicionin e saj mbi sulmet e mëtejshme, për të krijuar besimin e nevojshëm për një dialog të vërtetë.
