Interpoli prangos 20 persona në operacionin kundër abuzimit seksual me fëmijë në 12 vende

Organizata globale policore Interpol thotë se 20 persona janë arrestuar në Evropë dhe Amerikë pas një operacioni ndërkufitar në 12 vende që synonte materiale abuzimi seksual me fëmijë. Operacioni, i udhëhequr nga policia spanjolle, filloi në fund të vitit të kaluar pasi oficerët e policisë identifikuan grupe mesazhesh online që qarkullonin pamje të shfrytëzimit seksual me fëmijë. Autoritetet spanjolle arrestuan shtatë të dyshuar, përfshirë një punonjës të kujdesit shëndetësor dhe një mësues, tha Interpol. Punonjësi i kujdesit shëndetësor dyshohet se pagoi të mitur në Evropën Lindore për imazhe eksplicite, ndërsa mësuesi akuzohet për posedim dhe ndarje të materialeve të abuzimit seksual me fëmijë përmes platformave të ndryshme online, raporton Associated Press, transmeton Klankosova.tv. Autoritetet në Amerikën Latine arrestuan 10 të dyshuar në shtatë vende, përfshirë tre në El Salvador dhe një mësues në Panama. Të dyshuarit e mbetur u arrestuan në pjesë të tjera të Evropës dhe Shteteve të Bashkuara. Deri më tani, janë identifikuar 68 të dyshuar të tjerë dhe hetimet janë duke vazhduar, tha Interpoli, transmeton Klankosova.tv.