Interit po i lëkundet lidershipi, 17 ndeshje pa humbje të Romës e 'dridhin' Inzaghin

Roma me Claudio Ranierin në krye të bankinës, ka harruar se çfarë do të thotë ta humbasësh një duel futbollistik. Kryeqytetasit e Italisë nuk kanë pësuar disfatë në plot 17 ndeshje, njofton Klankosova.tv. Ecuria e 'frikshme' e romakëve e shqetëson më së shumti kampionin aktual italian, pasi Interi ballafaqohet pikërisht më këtë kundërshtar, të dielen. Hubja në sekondat e fundit nga Bologna në xhiron e kaluar, ia ka lëkundur lidershipin "Nerazzurëve", pasi tani me nga 71 pikë, udhëheqin renditjen tabelare në Serie A, bashkë me Napolin. Këta të fundit dukshëm kanë punë më të lehtë këtë vikend, pasi në stadiumin e tyre "Armando Diego Maradona", janë nikoqirë të Torinos, raporton Klankosova.tv. Nga ana tjetër, sikur mos t'i mjaftonte Roma, Interi udhëton menjëherë drejt Barcelonës, ku të mërkurën e zhvillon aktin e parë gjysmëfinal në Ligën e Kampionëve. Kalendari aspak nuk 'buzëqesh' për "Zi-kaltërit" e Milanos, pasi duke qenë kaq i ngarkuar rrugëtimi në tri kompeticionet ku ishin në garë, ua shuajti shpresat për triumf të trefishtë, ku u eliminuan në Kupën e Italisë, nga rivali i qytetit, AC Milan. Nga një edicion me ambicie për "Tripleta", ekipi i udhëhequr nga Simone Inzaghi, rrezikon seriozisht që ta mbyll sezonin pa asnjë trofe, nëse do të bëjnë ndonjë hap falso në ballafaqimet e radhës, shkruan Klankosova.tv. Roma ndërkaq po lufton për pozitat që dërgojnë edicionin e ardhshëm në Ligën e Kampionëve, pasi me 57 pikë aktualisht, ka vetëm 3 sosh më pak se vendi i katërt, që për momentin e mban Bologna. Kryendeshja e xhiros së 34' të kampionatit elitar të futbollit italian, zhvillohet të dielën në stadiumin "Giuseppe Meazza", me fillim në orën 15:00. Kjo super ndeshje transmetohet direkt në kanalin Sport 2 të platformës gjigante, ArtMotion!