Lajmet e fundit
Një sulm ajror izraelit shënjestroi shefin ushtarak të Hamasit Mohammed Deif në Gaza të shtunën, tha një zyrtar i sigurisë dhe Radio Ushtria e Izraelit.
Sipas tyre kjo ndodhi në një sulm, për të cilin Ministria e Shëndetësisë e enklavës tha se kishte vrarë të paktën 71 palestinezë.
Nuk ishte e qartë nëse Deif u vra, tha zyrtari i sigurisë, raporton Reuters, transmeton Klankosova.tv.
Radio Ushtria tha se Deif ishte fshehur në një ndërtesë në zonën humanitare të caktuar nga Izraeli Al-Mawasi, në perëndim të qytetit jugor të Khan Younis.
Deif raportohet se ishte një nga organizatorët e sulmit të Hamasit më 7 tetor ndaj Izraelit që shkaktoi luftën në Gaza. Ai u ka mbijetuar shtatë tentativave izraelite për vrasje, më e fundit në vitin 2021 dhe ka kryesuar listën e më të kërkuarve të Izraelit për dekada.
Ministria e Shëndetësisë së Gazës tha se të paktën 71 palestinezë ishin vrarë në sulm dhe 289 u plagosën.
Ministri izraelit i Mbrojtjes Yoav Gallant po zhvillonte konsultime speciale, tha zyra e tij, në dritën e "zhvillimeve në Gaza".
Ishte e paqartë se si sulmi do të ndikonte në bisedimet e armëpushimit që po zhvillohen në Doha dhe Kajro.
Zyra e mediave e drejtuar nga Hamasi tha se të paktën 100 njerëz ishin vrarë dhe plagosur, duke përfshirë anëtarë të Shërbimit të Emergjencave Civile. Ushtria izraelite tha se po shqyrtonte raportin.
Një zyrtar i lartë i Hamasit nuk konfirmoi nëse Deif kishte qenë i pranishëm dhe i quajti akuzat izraelite "të pakuptimta".
“Të gjithë dëshmorët janë civilë dhe ajo që ndodhi ishte një përshkallëzim i rëndë i luftës së gjenocidit, i mbështetur nga mbështetja amerikane dhe heshtja botërore”, tha Abu Zuhri për Reuters, duke shtuar se sulmi tregoi se Izraeli nuk ishte i interesuar të arrinte një marrëveshje armëpushimi.
