Identifikohet i moshuari që u gjet i vdekur në një rrugë të Prizrenit

Policia ka njoftuar se është identifikuar i moshuari që u gjet i vdekur të enjten në rrugën “Edit Durham” në Prizren.. Sipas njoftimit zyrtar, trupi i pajetë është dërguar në IML për obduksion, ndërsa nuk janë konstatuar shenja dhunë në trupin e të njëjtit, transmeton klankosova.tv. “Me datën 26.03.2026, rreth orës 11:36, Policia ka pranuar një informatë për një rast ku një person është gjetur pa shenja jete në rrugën “Edit Durham” në Prizren. Patrulla policore, së bashku me ekipin kujdestar të hetuesisë dhe ekipin e krim-teknikës, kanë dalë në vendin e ngjarjes. Viktima ishte mashkull i moshuar, rreth 70 vjeç, pa shenja të dhunës. Trupi i pajetë është dërguar në Institutin e Mjekësisë Ligjore në Prishtinë për ekzaminime të mëtejshme, ndërsa në konsultim me prokurorin është iniciuar rasti ‘hetim i vdekjes’”. “Fillimisht, përmes mediave është kërkuar ndihma e qytetarëve për identifikimin e viktimës. Ndërkohë, hetuesit e Sektorit të Hetimeve Rajonale Prizren kanë ndërmarrë veprime të menjëhershme në terren, duke mbledhur informata dhe duke kontaktuar familjarët e personit të gjetur pa shenja jete. Bazuar në të dhënat e siguruara, është arritur të identifikohet vendbanimi i viktimës dhe familjarët e tij kanë bërë identifikimin e personit”, thuhet në njoftim.