I ndërpritet masa e arrestit shtëpiak ish zëvendëssekretarit të MMPH-së Izedin Bytyqit

Gjykata Themelore në Prishtinë ka vendosur të ndërpresë masën e arrestit shtëpiak për të Izedin Bytyqin, ish-zëvendës sekretar në Ministrinë e Mjedisit, Planifikimit Hapësinor dhe Infrastrukturës. Bytyqi po hetohet si i dyshuar për veprat penale të keqpërdorimit të pozitës apo autoritetit zyrtar dhe mbajtjen në pronësi, kontroll ose posedim të paautorizuar të armëve. Kjo u konfirmua për Klankosova.tv nga zëdhënësja e kësaj gjykate, Mirlinda Gashi. "Të pandehurit I.B i është ndërprerë masa e arrestit shtëpiak, ashtu që i njëjti mbrohet në liri", tha Gashi për Klankosova.tv Tutje, ajo bëri të ditur se Prokuroria Speciale e Republikës së Kosovës me datë 02.12.2024 ka paraqitur në Gjykatën Themelore Prishtinë - Departamenti Special kërkesë për ndërprerjen e masës së arrestit shtëpiak për të pandehurin I.B, duke theksuar se kjo prokurori ka ndërmarrë veprime hetimore me qëllim të zbardhjes se kësaj çështjeje penalo - juridike, andaj nga gjyqtari i procedurës paraprake është kërkuar që të ndërprehet masa e arrestit shtëpiak për të pandehurin I.B, pasi PSRK konsideron se kanë pushuar shkaqet për të cilat është caktuar kjo masë, është kërkuar që të njëjtit ti hiqet masa e arrestit shtëpiak dhe hetimi ndaj të pandehurit I.B. të zhvillohet në procedurë të rregullt. "Gjyqtari i procedurës paraprake erdhi në përfundim se kërkesa e Prokurorisë Speciale të Republikës së Kosovës është e bazuar, për ndërprerjen e masës së arrestit shtëpiak kundër të pandehurit I.B dhe procedura penale ndaj tij do të zhvillohet në procedurë të rregullt duke u mbrojtur në liri", theksoi Gahsi për Klankosova.tv Izedin Bytyqi, u arrestua më 9 tetor në aksionin që Prokuroria Speciale kishte ndërmarrë në Ministrinë e Mjedisit, Planifikimit Hapësinor dhe Infrastrukturës.