Vitia njofton se mbi 133 mijë vaksina AstraZeneca kanë skaduar, paralajmëron dy donacione tjera

Ministri i Shëndetësisë, Arben Vitia, ka njoftuar se mbi 133 mijë doza të vaksinës AstraZeneca që ishin donacion nga Norvegjia janë hequr nga administrimi pasi u ka skaduar afati i përdorimit. Vitia në një konferencë për media tha se shumë dezinformata janë shpërndarë rreth afati të këtyre dozave dhe nga deputetë të Kuvendit, njofton Klankosova.tv. “Sot janë hequr nga administrimi 133 mijë e 234 vaksina nga AstaZeneca, pjesë e donacionit nga Norvegjia të cilave u ka skaduar afati. Natyrisht se ky nuk është një lajm i mirë, si Ministri e Shëndetësisë qysh në fillim kemi lajmëruar se afati i tyre është 31 gushti i këtij viti. “Pavarësisht kësaj ka pasur edhe shumë dezinformata përfshirë këtu fatkeqësisht edhe deputet të Kuvendit të Kosovës për afatin e këtyre vaksinave. Përveç tjerash kjo ka ndikuar dukshëm në uljen e interesimit të qytetarëve për të marrë këtë vaksinë deri në refuzim të marrjes së këtyre vaksinave”, u shpreh Vitia. Mes tjerash Vitia tha se vaksinat që janë në stoqet e ministrisë janë të sigurta teksa ka paralajmëruar dy donacione tjera gjatë këtyre javëve. “Një pjesë e madhe e vendeve të rajonit dhe jo vetëm nuk e kanë pasur mundësinë e zgjedhjes dhe janë vaksinuar edhe me vaksina jo të cerfikuara në EMA dhe FDA. Për ne si Qeveri e Kosovës siguria dhe cilësia e vaksinave është parësore – prandaj nuk kemi pasur kompromis në këtë drejtim dhe nuk do të kemi as në të ardhmen”. “Vaksinat që janë në stoqet tona janë vaksina të sigurta dhe për këtë jo vetëm ne garantojmë por edhe mekanizmat si OBSH, CDC”. “Ju sigurojë se momentalisht kemi mjaftueshëm vaksina dhe nuk do të lejojmë në asnjë moment që stoqet tona të mbeten pa vaksina për asnjë moment. Në fund të kësaj jave ose në fillim të javës tjetër të marrim edhe 150 mijë vaksina nga Gjermania dhe një javë më pas edhe 100 mijë të tjera nga Italia”. "Edhe këto vaksina janë AstaZeneca që kanë afat deri në nëntor të këtij viti. Por, gjithashtu deri në fillim të javës tjetër presim të vijnë edhe pjesa tjetër e vaksinave Pfizer nga donacioni i Shteteve të Bashkuara të Amerikës si dhe mbi 200 mijë doza nga kontrata bilaterale që kemi me kompaninë Pfizer, dhe të cilat vazhdojnë të vijnë në fillim të çdo jave", tha Vitia. Vitia po ashtu bëri të ditur se duke filluar nga java tjetër, do të kryhet vaksinimi edhe ditëve të fundjavës.