Hoti: Ndihma e njëhershme nuk i zbut pasojat e inflacionit, zgjidhja është indeksimi i pensioneve dhe asistencës sociale

Deputeti i LDK-së, Abdullah Hoti, ka publikuar të dhëna të Agjencisë së Statistikave, për familjet që nuk mund të përballojnë shpenzimet elementare. Hoti thekson shkaktari kryesor i kësaj situate është inflacioni, teksa shtoi se thellimi i krizës sipas tij, erdhi si rezultat i mungesës së masave adekuate për të zbutur pasojat e inflacionit për familjet. “Sipas Agjencisë së Statistikave të Kosovës: - 43.4% e familjeve nuk mund të përballojnë një shpenzim të papritur prej 100 eurove nga burimet e tyre vetanake; - 49.2% e familjeve nuk mund të mbulojnë shpenzimet e një shujte çdo dy ditë që përfshinë mishin, pulën dhe peshkun; - 48.8% e familjeve kanë deklaruar se pagesa e borxheve është barrë e rëndë financiare; - 8.1% e familjeve kishin vështirësi të mëdha, ndërkaq 20.1% përballeshin me vështirësi, në kryerjen e pagesave të nevojshme të zakonshme të familjes, marrë parasysh të ardhurat”,  shkroi Hoti. Deputeti i LDK-së propozon këtë zgjidhje. “Zgjidhja është: (1) indeksimi i pensioneve dhe asistencës sociale, së paku aq sa ka qenë inflacioni, në mënyrë që të ruhet standardi minimal i jetës së familjeve më të cenueshme nga inflacioni, si dhe (2) zgjerimi i përkohshëm i listës së mallrave me normë të reduktuar të TVSH-së prej 8 për qind”, shtoi ai. “E kemi ngritur vazhdimisht në Kuvend dhe jashtë Kuvendit, se ndihma e njëhershme nuk është zgjidhje për zbutjen e pasojave të inflacionit. Tani këtë po e dëshmojnë statistikat e Qeverisë”.