Haziri: Në Spitalin e Gjilanit nuk kemi të shtrirë asnjë pacient me COVID-19

Komiteti i Gjilanit për parandalimin e përhapjes së COVID-19, nën udhëheqjen e kryetarit Lutfi Haziri, ka mbajtur takimin e radhës për vlerësimin e situatës së përballjes me këtë virus në dy ditët e fundit. Në këtë takim, drejtori klinik i Spitalit të Përgjithshëm, kshin Ismaili, ka bërë të ditur në këtë spital nuk është i shtrirë asnjë pacient me COVID-19, ndërkohë që janë vetëm 3 raste aktive. Kryetari i Gjilanit, Lutfi Haziri, ka falënderuar mantelbardhët për punën në luftën kundër këtij virusi. “Në ditën e 602 të menaxhimit të situatave kundër COVID-19, lajmi më i mirë është që nuk e kemi asnjë pacient pozitiv të shtrirë në Spitalin e Përgjithshëm, ndërkohë që i kemi vetëm 3 raste aktive, të cilat pritet të negativizohen shumë shpejt. Fatkeqësisht 200 qytetarë e kanë humbur betejën me virusin dhe solidariteti ynë shkon me familjet e tyre. Falënderoj Komitetin anti-COVID-19 dhe mantelbardhët për punën e jashtëzakonshme që kanë bërë në luftë kundër këtij virusi”, ka thënë kreu i Gjilanit, transmeton Klankosova.tv Në këtë takim kanë dhënë mesazhet e tyre dhe drejtoresha e Qendrës Rajonale të Shëndetit Publik, dr. Ajhane Sefiu dhe drejtoresha e QKMF-së, dr. Arbenita Hajdari. Hajdari ka bërë të ditur se nesër do të bëhet një tendë mobile për të gjithë ata që për çfarëdo arsye nuk kanë mundur të vaksinohen. “Ekipet tona do t’i presin qytetarët për vaksinim në sheshin e Gjilanit”, ka thënë Hajdari. Gjendja e përgjithshme në Gjilan prej fillimit të pandemisë është si vijon: nga 27654 mostra, 9843 qytetarë kanë rezultuar pozitivë, 9640 janë shëruar, 200 persona e kanë humbur betejën, 3 raste janë aktive, 84029 qytetarë deri tani janë vaksinuar, në hospitalizim me COVID pozitiv nuk është asnjë pacientë, ndërkaq 6 mostra janë në pritje për rezultat.