Lajmet e fundit
Kandidatja për deputete nga Aleanca për Ardhmërinë e Kosovës, Teuta Haxhiu, ka deklaruar se mbështetja qytetare dhe investimet e mërgatës janë një motiv i fuqishëm për partinë, duke theksuar se shumë qytetarë që në të kaluarën kanë pasur besim diku tjetër, sot po i bashkohen AAK-së.
Haxhiu, në “Edicionin Special” në Klan Kosova, tha se përkrahja për Aleancën po rritet çdo ditë, ndërsa mërgata, sipas saj, po luan një rol të rëndësishëm në zhvillimin e vendit përmes investimeve, transmeton Klankosova.tv.
“Është një motiv. Ka njerëz që na mbështesin çdo ditë, po na përkrahin, afrohen çdo ditë, vijnë vet, dhe po, kanë besuar dhe është krejt normale që kanë pasur një besim në 2021-ën, mirëpo sot kanë ndryshuar edhe fatmirësisht na e kanë zbukuru fshatrat, rrugët e lagjet. E shyqyr që ne kemi mërgatën, shyqyr që i kemi njerëzit tanë që e duan këtë vend, e që investojnë në këtë vend”, tha Haxhiu.
Ajo theksoi gjithashtu se Aleanca, si dhe kryetari i saj Ramush Haradinaj, kanë lënë gjurmë të rëndësishme në proceset shtetërore.
Sipas Haxhiut, gjatë Qeverisë Haradinaj janë shënuar arritje të mëdha, përfshirë themelimin e Ushtrisë së Kosovës, ligjin që e bën Trepçën pronë të Kosovës, si dhe miratimin e ligjit për punëtorët e arsimit të viteve ’90-ta.
“Aleanca ka lënë gjurmë, zotëri Haradinaj ka lënë gjurmë në këtë vend, sot kemi Ushtrinë e Kosovës falë Qeverisë Haradinaj. Kemi Trepçën, që sot është pronë e Kosovës me ligj, falë Qeverisë Haradinaj. Kemi ligjin për punëtorët e viteve ’90-ta të arsimit”, u shpreh ajo.
