Harrojeni “standardin e artë” të 10 mijë hapave në ditë, ja çka rekomandon studimi më i  ri

10 mijë hapa në ditë janë konsideruar prej kohësh si "standardi i artë" për shëndet të mirë fizik dhe mendor. Megjithatë, hulumtimet e reja tregojnë se vetëm 7,000 hapa në ditë janë të mjaftueshëm për të zvogëluar rrezikun e zhvillimit të 13 llojeve të ndryshme të kancerit. Sipas një studimi të Universitetit të Oksfordit, njerëzit që bëjnë 7 mijë hapa në ditë kanë një rrezik prej 11 për qind më të ulët për t'u prekur nga kanceri. Për ata që arritën 9 mijë hapa, rreziku u ul me 16 përqind, por shkencëtarët nuk panë përfitime shtesë me numër më të lartë hapash, shkruan Index.hr, transmeton Klankosova.tv. Një studim i gjerë i kryer me më shumë se 85 mijë njerëz në Mbretërinë e Bashkuar ndoqi pjesëmarrësit që mbanin pajisje gjurmuese aktiviteti për një javë, të cilat regjistronin si numrin e hapave ashtu edhe intensitetin e lëvizjes. Studiuesit i kontaktuan përsëri gjashtë vjet më vonë dhe zbuluan se njerëzit që ecnin midis 5 mijë dhe 9 mijë hapave në ditë kishin një rrezik më të ulët për të zhvilluar kancer, pavarësisht shpejtësisë me të cilën ecnin. Hulumtimi monitoroi format e kancerit që më parë ishin gjetur të shoqëruara me një nivel të ulët të aktivitetit fizik: kanceri i ezofagut, mëlçisë, mushkërive, veshkave, stomakut, endometrit, leuçemia mieloide, mieloma multiple, kanceri i zorrës së trashë, kokës dhe qafës, rektumit, fshikëzës dhe gjirit. Gjatë periudhës gjashtëvjeçare, vetëm tre përqind e pjesëmarrësve zhvilluan një nga këto lloje kanceri. Kanceri i zorrës së trashë dhe i mushkërive ishte më i zakonshmi tek burrat, ndërsa kanceri i gjirit, i zorrës së trashë, i endometrit dhe i mushkërive mbizotëronte tek gratë, sipas një studimi të botuar në British Journal of Sports Medicine. Zëvendësimi i të qëndruarit ulur me aktivitet fizik të lehtë ose të moderuar uli rrezikun e kancerit, por kalimi nga aktiviteti i lehtë në atë të moderuar nuk ofroi përfitime shtesë. Aktiviteti i lehtë fizik mund të ndihmojë në rregullimin e niveleve të insulinës Sipas Institutit për Kërkime mbi Kancerin, aktiviteti i lehtë fizik mund të ndihmojë në rregullimin e niveleve të insulinës, një hormon që ndihmon trupin të përpunojë ushqimin në energji. Çekuilibri i insulinës shoqërohet me zhvillimin dhe përparimin e kancerit. Ecja gjithashtu ndihmon trupin të mbrohet kundër infeksioneve që mund të çojnë në kancer dhe kontribuon në ruajtjen e një peshe të shëndetshme trupore. Duke shkruar rreth këtij hulumtimi për The Conversation, biokimistja Mhairi Morris theksoi se nuk është e nevojshme të bësh 7 mijë hapa menjëherë. Mund t’i shpërndash gjatë gjithë ditës - duke marrë shkallët në vend të ashensorit, duke ecur gjatë pushimeve, gjatë telefonatave ose duke parkuar më larg destinacionit tënd.