Haradinaj: VV po pret përfundimin e mandatit të presidentes, pastaj nisin zhvillimet

Kryetari i AAK-së, Ramush Haradinaj, ka folur para fillimit të seancës së Kuvendit të Kosovës lidhur me çështjen e zgjedhjes së presidentit. Ai tha se Lëvizja Vetëvendosje ka një plan të qartë kohor dhe nuk po nxiton me procesin. Sipas tij, për VV-në është me rëndësi që kryetarja e Kuvendit të marrë edhe rolin e ushtrueses së detyrës së presidentit. “LVV e ka një plan në kohë. Për ta është me rëndësi që kryetarja e Kuvendit të jetë edhe ushtruese e detyrës së presidentit, prandaj nuk po nguten. Pastaj mbetet të shihet se si do ta menaxhojnë situatën, por ne varemi nga iniciativa e tyre. Po shihet qartë që kjo është e lidhur me përfundimin e mandatit të presidentes aktuale. Pra, LVV po pret. Çdo gjë pritet të fillojë në momentin kur të kemi një ushtrues detyre të ri të presidentit. Njëherë të marrë detyrën Haxhiu, e pastaj të nisin konsultimet e mëtejshme”, tha Haradinaj para mediave, njofton Klankosova.tv. Ai theksoi se partia e tij i ka gjashtë vota, por nuk janë të përcaktuara se si do të veprohet. “AAK i ka votat, janë gjashtë, por ende nuk janë të përcaktuara se si do të veprohet. Nuk kemi asnjë zhvillim konkret dhe është e qartë që gjithçka lidhet me kohën, pra të shkojë Osmani, me qenë ushtruese e detyrës Haxhiu, dhe pastaj të shohim se çfarë do bëjnë”, shtoi kreu i Aleancës./Klankosova.tv