Haradinaj: Pas 9 shkurtit do të krijojmë kushtet e duhura për një zhvillim të qëndrueshëm të ekonomisë

Kryetari i AAK-së, Ramush Haradinaj, ka thënë se përkundër sfidave të vazhdueshme nga ana e qeverisë, bizneset vendëse vazhdojnë të mbijetojnë dhe të rriten. Sipas Haradinaj, ato po zgjerojnë kapitalin, po krijojnë vende të reja pune dhe po kontribuojnë ndjeshëm si tatimpagues për zhvillimin e vendit, transmeton Klankosova.tv. "Mungesa e një perspektive të qartë euro-atlantike, e cila lidhet drejtpërdrejt me çështjet e sigurisë, e ka bërë tepër të vështirë të bërit biznes në Kosovë. Kësaj i shtohet edhe pabarazia me tregjet rajonale, ku shumë biznese subvencionohen, ndërsa bizneset tona përballen me burokraci të ndërlikuar dhe një politikë të gabuar fiskale. Megjithatë, përkundër këtyre sfidave të vazhdueshme nga ana e qeverisë, bizneset tona vendëse vazhdojnë të mbijetojnë dhe të rriten. Ato po zgjerojnë kapitalin, po krijojnë vende të reja pune dhe po kontribuojnë ndjeshëm si tatimpagues për zhvillimin e vendit", ka shkruar Haradinaj në Facebook. "Në ceremoninë e 22-vjetorit të themelimit të AKB-së, i shpreha mirënjohjen time kryetarit Agim Shahini dhe ekipit të tij për promovimin e ekonomisë kosovare dhe përkushtimin në ndërtimin e një bashkëpunimi të qëndrueshëm mes sektorit publik dhe atij privat". Ndërkaq, kreu i AAK-së shton se si [arti janë të vendosur të sjellin politika që do të mbështesin rritjen ekonomike, do të thjeshtojnë procedurat dhe do të fuqizojnë sipërmarrësit. "Ne jemi të vendosur të sjellim politika që do të mbështesin rritjen ekonomike, do të thjeshtojnë procedurat dhe do të fuqizojnë sipërmarrësit tanë. Pas 9 shkurtit, do të krijojmë kushtet e duhura për më shumë histori suksesi dhe për një zhvillim të qëndrueshëm të ekonomisë së Kosovës".