“Hapat e parë në kamp”, artisti nga Maqedonia hap ekspozitë në Prishtinë me fotografi të refugjatëve

Ekspozita “Hapat e parë në kamp” e artistit Osman Demiri, hapet sonte nga ora 19:00, në Open Art Gallery në Prishtinë. Kjo ekspozitë përveç si një dëshmi vizuale e një prej plagëve më të thella kombëtare, ajo është një meditim mbi esencën e vazhdimësisë njerëzore. Në imazhe nuk është i shfaqur vetëm akti i mbijetesës, por edhe përpjekja e pashmangshme e njeriut për të ecur përpara edhe atëherë kur toka nën këmbë është e përkohshme. Qëllimi i kësaj ekspozite me fotografi është shkëputja e vëmendjes nga gjithë ajo e keqe dhe ai tmerr i popullatës jashtë kufijve dhe përqendrimi tek shpresa e vetme e tyre, tek fëmijët. Ideja e ekspozitës është që së paku në mënyrë virtuale të ndahen skenat dhe pasojat e dhunës makabre nga jeta e sinqertë dhe e padjallëzuar fëmijërore dhe të prezantojë një jetë sa më normale të këtyre fëmijëve në një vend ku fati i solli padrejtësisht.