Hamza i përgjigjet Abdixhikut: Jemi të hapur për diskutime (VIDEO)

Kandidati për kryeministër nga radhët e PDK-së, Bedri Hamza sonte në emisionin “Rubikon” në Klan Kosova ka thënë se me Vetëvendosjen nuk shohim pika takimi. Ndërkaq është shprehur se programi i PDK-së dhe ai i LDK-së kanë ngjashmëri dhe është lehtë të harmonizohen. “Ne e kemi bërë të qartë, nuk mund të qeverisim bashkë, për shkak të dallimeve që i kemi. Ka pasur dallime edhe në të kaluarën, edhe sot ka dallime edhe në mes partive që janë në opozitë, por janë dallime të cilat mund të harmonizohen”. “Nëse e marrim edhe e shikojmë programin e Partisë Demokratike të Kosovës dhe Lidhjes Demokratike të Kosovës, ka dallime, por kanë edhe ngjashmëri dhe është shumë më lehtë me u harmonizu këto programe dhe me i zbatu edhe Partia Demokratike premtimet e veta elektorale, edhe Lidhja Demokratike premtimet e veta elektorale dhe partitë tjera. Me Vetëvendosjen nuk shohim pika takimi”, u shpreh ai. https://www.youtube.com/watch?v=6QieCTJ4aD8 Hamza gjithashtu iu përgjigj edhe deklaratave të kandidatit të LDK-së për kryeministër, Lumir Abdixhiku, i cili tha se nuk shkojnë me Vetëvendosjen dhe se LDK-ja hyn në një qeveri vetëm nëse e ka postin e kryeministrit. Bedri Hamza tha se prioritet për të është interesi i vendit dhe se janë të hapur për diskutime me partitë opozitare për përbërjen e Qeverisë së ardhshme, përcjell Klankosova.tv. “Për mua prioritetet janë interesi i vendit, pastaj interesi politik dhe i qëndroi kësaj, që i bie që vendi duhet të ketë institucione. Për mua është e qartë që partisë së parë i takon e drejta ligjore dhe kushtetuese me i bë të gjitha tentimet për t’i krijuar qeverinë” “Nëse partia e parë nuk arrinë t’i bëjë institucionet, atëherë situata është e qartë, shkon te partia e dytë dhe në këtë rast partia e dytë në bazë të rezultatit zgjedhor është Partia Demokratike e Kosovës”. “Ne jemi të hapur të bisedojmë me partitë me të cilat kemi qenë në opozitë dhe me partitë që kanë ulëse në Kuvendin e Republikës së Kosovës, të diskutojmë për përbërjen e qeverisë së ardhshme, një qeveri e cila punon dhe e cila i zbaton premtimet në fushatën zgjedhore. Ne do ta thërrasim edhe LDK-në edhe AAK-në edhe të gjitha partitë tjera”, është shprehur tutje Hamza. https://www.youtube.com/watch?v=vRlYsnzhsRk