Halimi në Ditën e Çlirimit ndan poezi për të mbijetuarat e dhunës seksuale

Anëtarja e kryesisë së LDK-së, njëherësh poete, Sibel Halimi, në Ditën e Çlirimit të Kosovës, u ka kushtuar poezi, të mbijetuarave të dhunës seksuale. Ajo, ka ripostuar në facebook, poezinë e quajtur “Copë”, pasi sipas saj, edhe pas 23 vjetësh, gratë që janë dhunuar seksualisht gjatë luftës, ende përballen me vështirësitë e mbijetesës dhe barrën e heshtjes. “Ripostim me shkas. Ditë reflektimi e çlirimi për gratë e mbijetuara të dhunës seksuale të cilat edhe sot, pas 23 viteve ballafaqohen me vështirësitë e mbijetesës dhe barrën e heshtjes”, ka shkruar Halimi në facebook. Më poshtë e gjeni poezinë e Halimit, kushtuar të mbijetuarave të dhunës seksuale: Copë Me mijëra fustana shtri në fushë jeshile Sytë t’i marrin N’këtë fushë lodrue s’kemi E jona kurrë s’asht kenë Bojnat e fustanave pikturë jetën na e banë Të mitë janë tetanë Fatin e secilit unë e kam pasë E zeza lindjen ma kujton Mallkimin që bani edhe trajt’ me qa Nji fustan i bardhë me nji kordele t’ndame n’dysh n’cep gjini, trishtim Ah si e mbaj mend këtë ngjyrë, kur bardhësinë ma pshtetën për shpine E shtrime përtoke në shpinë ku gjithnji derë e huej m’thanë E huej mos kjofsha kenë Shumë fustana po i shoh Duhmë vuejtje si temjan Të varun në vig që s’kputet kurrë Se fati i tyne asht tanë kohën n’luhajë Fustan I gjatë, i shkurtë as mini as korset, mortajë Krejt gratë çue n’kamë ka nji fustan me lanë në fushën e virgjënisë Me vjerrë në vigun e heshtjes Sepse ato të paprishuna kanë metë Virgjëninë - tapi për një jetë të tanë Edhe unë nji po e la Nji pjesë timen vjerrun N’përvuejtni Fustanin e kuq t’dashnisë teme t’parë E dhunueme po, virgjëneshë përjetësisht! Nga libri me poezi "Me ekzistu është vetë kuptimi".