Greqi: Shqiptarët e burgosur futen në grevë urie, ankohen për shkelje të të drejtave

Disa nga të burgosurit shqiptarë në Greqi, kanë njoftuar se kanë filluar një grevë urie. Ata thonë se këtë po e bëjnë sepse sipas tyre u janë shkelur të drejtat që i takojnë për lirimin me kusht. Në grevë janë futur edhe të dënuar të kombësive të tjera, raporton Tvklan.al, transmeton Klankosova.tv. Përmes një deklarate, ata kërkuan nga ana e institucioneve të drejtësisë në Greqi që të merren masa për kërkesat e tyre. Personat që kohën e kalojnë prapa grilave, kërkojnë që të rregullohet kuadri ligjor për lirimet me kusht, në mënyrë që së pari të zbatohet ligji që ka qenë në fuqi në kohën e kryerjes së veprës penale, si dhe të mos cenohet e drejta që të trajtohen me ligjin me të butë. Të dënuarit pretendojnë se drejtësia greke nuk e njeh të drejtën e lirimit me kusht, dhe se po i mban në burg në mënyrë të paligjshme. Sipas informacioneve të disa prej të dënuarve ata kanë 1-2 vite që janë në pritje për të shqyrtuar kërkesat e tyre për lirim me kusht, ndërkohë janë afro 16 mijë të dënuar dhe paraburgosur që deri në fund të korrikut mund t’u bashkohen grevës.