Grabiti një mishtore në Mitrovicë V., vetëdorëzohet i dyshuari recidivist – kërkohej edhe për 26 vepra të ngjashme

Një grabitje e ndodhur më 14.08.2024 rreth orës 23:00 në rrugën “Sutjeska” në Mitrovicë të Veriut, ka rezultuar me arrestimin e një të dyshuari, i cili kërkohej edhe për 26 vepra tjera të ngjashme. Veton Elshani, Zëvendëskomandanti i Policisë së Kosovës për rajonin e veriut, ka thënë për Klan Kosova se grabitja ka ndodhur në mishtoren “North City”, ku një person i dyshuar kishte hapur derën e mishtores me mjet të fortë, dhe nga lokali kishte vjedhur para të gatshme rreth 6000 dinarë, një laptop në vlerë prej 400 Euro dhe një telefon celular në vlerë prej 150 Euro, raporton Klankosova.tv. Rasti, sipas Elshanit është raportuar nga ankuesi të nesërmen më datë 15.08.2024 në ora 08:30. Menjëherë, njësitet patrulluese, së bashku me hetuesit e SP Veriu, i janë përgjigjur, është iniciuar rasti “Vjedhje e rëndë”, ndërsa hetuesit, sipas Elshanit, menjëherë kanë filluar me hetimin e rastit, shikimin e kamerave, duke identifikuar të gjitha kamerat e mundshme në qytet që mund të japin pamje për të dyshuarit. Pasi është identifikuar i dyshuari, një shqiptar i Kosovës i lindur më 1987, policia ka shkuar disa herë në shtëpinë e tij, por nuk e ka hasur aty. Por, gjatë ditës së sotme, i dyshuari është vetëdorëzuar në Polici. “Pas një pune ekipore nga ana e hetuesve, është arritur që të identifikohet personi i cili ka kryer veprën në fjale. Personi i dyshuar, M/SH/K viti i lindjes 1987, është kërkuar disa herë në shtëpinë e tij, mirëpo nuk është hasur, ndërsa më datë 24.08.2024 personi është vetëdorezuar në Sp Veriu, është intervistuar në prani të mbrojtësit të tij dhe ka dorëzuar gjerat e vjedhura”. “Pas verifikimit të personit të dyshuar, i njëjti rezulton të jetë recidivist i veprave të ngjashme penale në të kaluarën (26 raste)”, ka theksuar Elshani për Klan Kosova. Lidhur me rastin në fjalë, pas konsultimit me prokurorin, i njëjti është dërguar në mbajtje për 48 orë, ndërsa gjerat e vjedhura do t’i kthehen pronarit. /Klankosova.tv