Golden State vazhdon dominimin (VIDEO)

Golden State është duke dëshmuar se është skuadër e jashtëzakonshme. Në “Oracle Arena” luftëtarët fituan sfidën e 32-të rresht në shtëpi dhe këtë e bënë ndaj një kundërshtari të veçantë, Clevelandit të mbretit LeBron. 89-83 triumfuan kampionët që regjistruan suksesin e 28 në 29 takimet e këtij sezoni duke thyer mbrojtjen e hekurt të miqve që rezistuan deri në fund por nuk arritën të thyenin mallkimin ndaj skuadrës kaliforniane. Me Irving ende jo në formën më të mirë, Cleveland nuk tregoi fuqinë e duhur në sulm. Takimi nisi nën presionin e Golden State që e mbylli periodën e parë 28-19, por Cavaliers e orientuan sfidën në planin fizik duke barazuar 31-31. Gjatë minutave në vazhdim, Curry u shfaq i lodhur dhe me një dëmtim në pulpë që e pengoi të zhvillonte ndeshjen perfekte, por situatën e mori në dorë Green që në fillimin e pjesës së dytë e ndihmoi skuadrën e tij të shkonte deri në avantazhin +8. Një ndeshje pozitive zhvilloi edhe Livingston me 14 pikë personale, ndërsa LeBron James gaboi disa tentativa duke u dorëzuar në fund të një sfide që ndoshta nuk ishte nga më spektakolaret e këtij sezoni.