Gjykata Administrative në Prishtinë do të fillojë punën pa kryetar

Më pesë maj të këtij viti, zyrtarisht fillon punë Gjykata Administrative në Prishtinë. Kjo gjykatë e cila pritet të sistemohet në objektin A të Pallatit të Drejtësisë në Prishtinë, do të ketë katër departamente, raporton gazetarja e Klan Kosovës, Blerta Ahmeti. Departamenti i Përgjithshëm, për Skemat Sociale dhe Pensionale të Financuara nga Shteti, departamenti Fiskal dhe ai për Konteste të Punës. Në këtë gjykatë, më 5 maj do të fillojnë punën 17 gjyqtarë, ndërsa pesë të tjerë më 1 korrik. Pa u zgjidhur, në këtë gjykatë ka mbetur kryetari i saj. Për shkak të mungesës së kuorumit në Këshillin Gjyqësor të Kosovës, për tre herë radhazi ka dështuar konkursi. Kështu, Ushtrues Detyre i Kryetarit të Gjykatës Administrative, deri në zgjedhjen e kryetarit, është gjyqtari Rexhep Gashi, i cili edhe aktualisht punon si gjyqtar në departamentin Administrativ të Gjykatës Themelore në Prishtinë. 5 maji, si datë, ishte caktuar në mbledhjen e 363 të Këshillit Gjyqësor të Kosovës. Kryesuesi i KGJK-së, Albert Zogaj kishte deklaruar se “kjo datë është brenda afateve ligjore”. /Klankosova.tv