Gjuriqi takon Lajçakun: Që nga ardhja e Kurtit në pushtet, pozita e serbëve në Kosovë është përkeqësuar

Ministri i Punëve të Jashtme i Serbisë, Marko Gjuriq, ka takuar sot Miroslav Lajçakun, përfaqësuesin special të Bashkimit Evropian për dialogun ndërmjet Kosovës dhe Serbisë. Siç njofton zyra për informim e kësaj ministrie, Gjuriqi i ka thënë Lajçakut se me ardhjen e Albin Kurtit në krye të qeverisë së Kosovës në vjeshtën e vitit 2021, “pati një përkeqësim drastik në pozitën e popullatës serbe dhe të tjerave joshqiptare, por edhe gjendja e përgjithshme” në Kosovë. “Regjimi i Kurtit vazhdimisht godet procesin e dialogut nën patronazhin e Bashkimit Evropian dhe zbaton masa represive që çojnë në krijimin” e një Kosove “monoetnike, e cila drejtpërdrejt i cenon qëllimet e bashkësisë ndërkombëtare”, citohet të ketë thënë Gjuriqi në këtë takim. Shefi i diplomacisë serbe i tha bashkëbiseduesit se Beogradi e mbështet draft-statutin e Asociacionit të komunave me shumicë serbe të hartuar nga BE-ja dhe tha se vazhdon të insistojë në zbatimin e plotë të marrëveshjeve të Brukselit. Gjuriqi tha po ashtu se në Kosovë ka “persekutim dhe shkelje sistematike të të drejtave individuale dhe kolektive njerëzore, ekonomike, kulturore dhe politike të komuniteteve joshumicë atje, kryesisht serbe”. Ai tha se Serbia është “e përkushtuar për paqen dhe stabilitetin në rajon”. /Klankosova.tv