Gjuajtje me armë zjarri në piramidat historike në Meksikë, vritet një turist – 13 plagosen

Një burrë i armatosur që qëndronte në majë të një prej piramidave historike të Teotihuacan hapi zjarr ndaj turistëve të hënën, duke vrarë një kanadez dhe duke lënë të paktën 13 të plagosur në vendin arkeologjik në veri të kryeqytetit të Meksikës, thanë autoritetet. Autori i sulmit u identifikua si 27-vjeçari Julio Cesar Jasso nga Meksika, tha një zyrtar shtetëror për AP-në në kushte anonimiteti sepse nuk është i autorizuar të flasë për rastin. Jasso më vonë vdiq nga një plagë me armë zjarri e shkaktuar vetë, thanë autoritetet, dhe zyrtarët e sigurisë gjetën një armë, një thikë dhe municione. Jasso ishte sulmuesi i vetëm në sulm, konfirmoi qeveria e Shtetit të Meksikës të hënën në mbrëmje, transmeton Klankosova.tv. Qeveria lokale tha se shtatë persona u plagosën nga të shtënat me armë zjarri. Nuk u bë e ditur se si u plagosën personat e tjerë, por një numër njerëzish ranë kur filluan të shtënat, disa ndërsa ngjiteshin në piramida.