“Gjithçka është shtrenjtuar”, Bajrami kritikon qeverinë për inflacionin

Deputetja e Lidhjes Demokratike të Kosovës, Hykmete Bajrami, ka reaguar ndaj rritjes së çmimeve në vend, duke akuzuar Qeverinë për mungesë veprimi përballë inflacionit dhe vështirësive ekonomike të qytetarëve. Sipas saj, ndërkohë që kryeministri Albin Kurti prezanton në arenën ndërkombëtare një narrativë për stabilitet ekonomik, të dhënat e publikuara nga Agjencia e Statistikave të Kosovës tregojnë një realitet tjetër. ASK ka bërë të ditur se inflacioni në muajin mars ka arritur në 6.7%, që përfaqëson rritjen mesatare të çmimeve krahasuar me vitin e kaluar. Megjithatë, Bajrami thekson se rritjet reale në kategori të caktuara janë shumë më të larta dhe prekin drejtpërdrejt jetën e përditshme të qytetarëve. Sipas saj, çmimet e disa shërbimeve dhe produkteve kanë pësuar rritje të ndjeshme, përfshirë: Shërbimet për pajisje personale të transportit (+42.5%), biletat e fluturimeve (+38.4%), furnizimin me ujë dhe shërbimet e banimit (+31.9%), energjinë dhe karburantet (+17.4%), lëndët djegëse të ngurta si druri dhe peleti (+15.6%), pemët (+13.1%), mishin (+12.4%), kafen, çajin dhe kakaon (+7.8%). Ajo shton se rritja e çmimeve nënkupton edhe rritje të të hyrave për buxhetin e shtetit përmes tatimeve, ndërsa qytetarët përballen me kosto gjithnjë e më të larta për nevojat bazike. “Gjithçka që qytetari ka nevojë për të jetuar është bërë më e shtrenjtë”, thekson Bajrami, duke vënë në pikëpyetje deklaratat për stabilitet ekonomik. Sipas saj, rritja e çmimeve në disa sektorë ka arritur nivele dyshifrore, duke detyruar qytetarët të heqin dorë nga shpenzime bazike. Deputetja e LDK-së pranon se një pjesë e inflacionit lidhet me zhvillimet globale, por kritikon Qeverinë për mungesë masash konkrete për ta zbutur ndikimin në ekonomi. Ajo argumenton se mbështetja për prodhimin vendor dhe zëvendësimi i importeve do të mund të ndikonin në stabilizimin e çmimeve. Në reagimin e saj, Bajrami akuzon kryeministrin Kurti se nuk është fokusuar në problemet e prodhuesve vendorë, përfshirë sektorin e përpunimit të qumështit, dhe se prioritet i Qeverisë mbetet menaxhimi politik, e jo zhvillimi ekonomik.