Gjinekologia thekson rëndësinë e marrjes së një vitamine për gratë pas menopauzës

Teksa plakemi, nevojat tona ushqyese ndryshojnë. Menopauza është një nga tranzicionet më të mëdha në jetën e një gruaje dhe gjinekologia dhe konsulentja mjekësore,  Tara Scott, thekson se ndryshimet hormonale ndikojnë në përthithjen e lëndëve ushqyese. “Ndryshimet hormonale, veçanërisht ulja e estrogjenit, ndikojnë në përthithjen dhe përdorimin e disa lëndëve ushqyese”, tha ajo për Parade. Ndryshimet hormonale mund të shoqërohen me ndryshime në metabolizëm, gjë që i bën ushqimet shumë ushqyese thelbësore për ruajtjen e shëndetit. Përveç kësaj, stresi dhe ndryshimet hormonale mund të prishin ekuilibrin e mikrobiomës së zorrëve, gjë që ndikon gjithashtu në përthithjen e lëndëve ushqyese, shkruan Index.hr, transmeton Klankosova.tv. Ndryshimet në nevojat ushqimore janë normale, por ekziston një vitaminë që mjekët thonë se shumica e grave pas menopauzës nuk e marrin mjaftueshëm: vitamina D. “Kjo vitaminë është thelbësore për përthithjen e kalciumit dhe shëndetin e kockave, gjë që është veçanërisht e rëndësishme për shkak të rritjes së rrezikut të osteoporozës pas menopauzës”, thekson Scott. Doza ditore e rekomanduar e vitaminës D për gratë në postmenopauzë është 600 njësi ndërkombëtare për njerëzit nën moshën 70 vjeç dhe 800 njësi për ata mbi 70 vjeç. Drita e diellit është burimi kryesor i vitaminës D dhe niveli i tij adekuat kërkon 15 minuta ekspozim të drejtpërdrejtë ndaj dielli tre deri në katër herë në javë. “Ushqimet si peshku i yndyrshëm dhe vezët janë burime të mira të vitaminës D, por shumë gra mund të kenë nevojë për suplemente, veçanërisht nëse rrezet e diellit janë të kufizuara”, përfundon ajo, transmeton Klankosova.tv