Gjilani mban koncert në nderim të qytetarëve të vdekur nga COVID-19

Është mbajtur sonte koncerti "Requiem of Hope" nga ClassiKos, në nderim të 93 qytetarëve të Gjilanit që humbën betejën me sëmundjen e rrezikshme. Koncerti është mbajtur duke respektuar masat anti-COVID-19. Drejtoresha e Kulturës në Gjilan, Deniza Limani ka falënderuar mantel-bardhët për punën e jashtëzakonshme që kanë bërë gjatë gjithë kohës së pandemisë. “Sonte bëjmë homazh për 93 qytetarët tanë të cilët e humbën betejën me virusin, i cili e ka gjunjëzuar botën dhe Kosovën. Është emocion për të folur këtu, sepse edhe unë e kam humbur një anëtare të familjes sime”, tha Limani. ClassiKos sollën një koncert të përmasave më ndryshe të muzikës serioze, ku u interpretuan vepra madhështore nga Moxart, R.Dhomi, C.Zadeja, T. Albinoni dhe A.Peterson, të cilat u performuan nga profesionistët e Gjilanit: Orkestrina dhe Kori nën udhëheqjen artistike të Burhan Azizi me dirigjente Florentina Rushiti - Bajrami dhe në piano Ndriqim Bajrami. Secila vepër e sjellë në skenë, ishte e përmbushur me shumë emocion. Një lidhje e pa përshkruar mes thjeshtësisë së melodisë dhe interpretuesve ku shprehej kontrasti i mprehtë mes të bukures dhe dhimbjes. Ndryshe, në skenë për secilën jetë të humbur nga ky virus ishte ndezur nga një qiri.