Gjenden eshtrat e të miturit, zbardhet vrasja e ndodhur 7 vjet më parë në Lezhë

Policia e Lezhës ka arrestuar një person, të akuzuar për një vrasje të kryer 7 vjet më parë, ku viktimë ishte një i mitur. Zbardhja e ngjarjes është bërë pasi policia ka zbuluar eshtrat e viktimës, të identifikuar si Mariglen Gjonaj, 16 vjeçar në kohën kur është kryer krimi.

I mituri ishte denoncuar si i zhdukur nga familja në vitin 2015. Policia tha se më 3 prill të këtij viti janë gjetur pranë hidroforit në fshatin Fushëkuqe të Kurbinit eshtrat që pas analizave rezultuan se ishin të të miturit.

Pas rifillimit të hetimeve, u bë e mundur edhe identifikimi i autorit të ngjarjes, Kristian Cenaj, 30 vjeç, lindur në Mamurras dhe banues në Kurbin. Policia tha se autori i dyshuar u arrestua një ditë më parë./A2Cnn