Lajmet e fundit
Gazetarja e Klan Kosova, Rina Mujku është shprehur se politikisht nuk është bërë mjaftueshëm për ish-krerët e Ushtrisë Çlirimtare të Kosovës që po mbahen në Hagë.
Sipas saj, pavarësisht se janë bërë kërkesa të vazhdueshme nga ana e mbrojtjes, institucionet nuk kanë reflektuar me vendime konkrete.
“Jo më larg se me 12 qershor në Ditën e Çlirimit, si simbolikë ka shkuar edhe një letër e fundit, drejtuar Qeverisë së Republikës së Kosovës, edhe Ministrisë së Financave, pavarësisht që kësaj here do të mund të thirreshin me atë arsyetimin që kanë qenë akoma në detyrë dhe nuk kanë mundur të marrin vendime edhe pse janë marrë vendime të shumta gjatë kësaj periudhe, e njëjta letër identike është dërguar edhe një vit më herët, pra në qershorin e vitit 2024 dhe sërish nuk ka pasur përgjigje pozitive karshi kërkesës së mbrojtjes, që është njëra prej kërkesave kryesore, se më tepër s’kanë çfarë të bëjnë”, tha Mujku.
Ajo në emisionin “Rubikon” në Klan Kosova, tha se si nga ana e Qeverisë tashmë në detyrë, si e ish-opozitës ka pasur mosveprime në këtë drejtim.
“Pastaj kemi mosveprime edhe nga ish-opozita, sepse kanë mundur që të kërkojnë krijimin e këtyre komisioneve parlamentare, që tash kanë bërë fushatë që do t’i kërkojnë gjatë këtij mandatit të legjislaturës së 10, edhe gjatë legjislaturës së 9-të kanë qenë shumë ligje të tjera që kanë pritur të votohen, përveç buxhetit, ata e kanë ditur fare mirë që viti 2026 është viti i aktgjykimit dhe nuk ka se ku të shkohet tutje, nuk kanë se çfarë të presin më tepër dhe kanë mundur që të lëshojnë pe, madje kanë pasur me tepër vota, më tepër deputetë në Kuvend ish-opozita, sesa kanë tash nga zgjedhjet parlamentare të 28 dhjetorit”, u shpreh gazetarja e Klan Kosova, Rina Mujku./Klankosova.tv
