Gazetarja Mujku nga Haga: Zyrapi, në qendër të dosjeve të mbrojtjes (VIDEO)

Sot në Dhomat e Specializuara të Kosovës, fjalët e fundit i dhanë mbrojtja e Rexhep Selimi dhe ajo e Jakup Krasniqi. Gazetarja e Klan Kosovës, Rina Mujku, raporton se edhe sot avokatja kryesore e Krasniqit, Venkateswari Alagendra, i kërkoi trupit gjykues të mos bie pre e gënjeshtrave të Zyrapit. E njëjta deklarimin e Bislim Zyrapit për 12 ditë në korrik 2024 u cilësoi si gënjeshtër. “Njëra prej momenteve më epike gjatë këtyre dëshmive padyshim se ka qenë edhe deklarimi i Bislim Zyrapit për 12 ditë, nga 1 deri më 18 korrik të vitit 2024, ku në ditën e fundit të dëshmisë, para se të përshëndetej me Gjykatën Speciale, është cilësuar si gënjeshtar nga avokatja kryesore e Jakup Krasniqit, Venkateswari Alagendra, e cila e përsëriti këtë akuzë edhe sot, duke i thënë trupit gjykues të mos bie pre e gënjeshtrave të Zyrapit”, tha Mujku. Seancat e mbrojtjes për katërshen e Ushtrisë Çlirimtare të Kosovës janë në fazën përfundimtare. Avokatët e Hashim Thaçit, Kadri Veselit dhe Rexhep Selimit kanë mbyllur fjalët e tyre përkatëse. Tani ka nisur mbrojtja e Jakup Krasniqit, e cila do të vazhdojë edhe të hënën. Po ashtu, më 16 shkurt, Zyra e Prokurorit të Specializuar do të japë përgjigje për pyetjet e trupit gjykues. Gjyqtari Charles Smith ka njoftuar se, më 17 shkurt, në orën 09:00, do të vazhdojë mbrojtja e Krasniqit, ndërsa pasdite, çështjet do të kalojnë tek Dhomat e Specializuara dhe ZPS-ja. Për më shumë detaje ndiqeni raportimin e gazetares Rina Mujku, që po përcjell krejt zhvillimet në gjykimin ndaj katërshes së Ushtrisë Çlirimtare të Kosovës. /Klankosova.tv https://www.youtube.com/watch?v=kdendyfqpto