FShF: E pavërtetë që shqiptarët e Kosovës janë përjashtuar nga ndeshja Shqipëri-Serbi

Federata Shqiptare e Futbollit e ka mohuar se tifozët shqiptarë nga Kosova janë të përjashtuar nga ndeshja Shqipëri-Serbi. “Federata e Futbollit dëshiron të përgënjeshtrojë kategorikisht një lajm të shpërndarë së fundmi nga një media online me bazë në Zvicër, që pretendon në mënyrë të rreme dhe pa asnjë bazë faktike se tifozët shqiptarë nga Kosova janë të përjashtuar nga ndeshja Shqipëri–Serbi, që luhet më 7 qershor në stadiumin ‘Arena Kombëtare’”, thotë FShF-ja në njoftimin në Facebook. “Ky informacion është krejtësisht i pavërtetë dhe abuziv. FSHF i ka dërguar një komunikim zyrtar medias në fjalë dhe është në pritje të një përgjigjeje formale”. Ata thanë se procesi do të bëhet përmes një sistemi transparent, duke shpjeguar edhe se si do të vijojë ai. “Sqarojmë se procesi i shitjes së biletave për ndeshjen Shqipëri–Serbi do të kryhet përmes një sistemi transparent dhe të hapur për të gjithë tifozët, pa asnjë diskriminim apo përjashtim”. “Aplikimi për bileta do të nisë më 15 maj, përmes një formulari elektronik që do të publikohet në faqen zyrtare të FSHF-së. Afati i aplikimit do të zgjasë dy javë dhe në fund të muajit maj do të zhvillohet një short kompjuterik, për të përzgjedhur tifozët që do të kenë të drejtën të blejnë biletat. Të përzgjedhurit do të njoftohen me email”.