Lajmet e fundit
Forcat e Armatosura të Irakut thanë të enjten se janë të detyruara "më shumë se kurrë" të përfundojnë misionin e Shteteve të Bashkuara në Irak, duke përmendur sulmin me dron gjatë natës në një automjet në kryeqytetin Bagdad, që vrau një komandant të lartë të milicisë pro-Iraniane Kataib Hezbollah. .
"Kjo trajektore e detyron qeverinë irakiane më shumë se kurrë të përfundojë misionin e këtij koalicioni, i cili është kthyer në një faktor për destabilitet dhe kërcënon të ngatërrojë Irakun në ciklin e konfliktit dhe forcat tona të armatosura nuk mund të neglizhojnë detyrat dhe përgjegjësitë e tyre kushtetuese", thuhet në deklaratë, raporton CNN, transmeton Klankosova.tv.
Forcat amerikane “kryen një atentat flagrant përmes një sulmi ajror në zemër të një lagjeje të banuar në kryeqytetin, Bagdad, duke mos treguar asnjë respekt për jetën e civilëve apo ligjet ndërkombëtare”, shtohet në deklaratë.
“Me këtë akt, forcat amerikane rrezikojnë paqen civile, shkelin sovranitetin e Irakut dhe shpërfillin sigurinë dhe jetën e qytetarëve tanë. Akoma më shqetësuese është se koalicioni devijon vazhdimisht nga arsyet dhe objektivat e pranisë së tij në territorin tonë”.
Sulmi ushtarak amerikan të mërkurën në Bagdad vrau një komandant të Kataib Hezbollah, i cili ishte përgjegjës për sulmet ndaj forcave amerikane në rajon, sipas Komandës Qendrore të ShBA-së.
Sulmi erdhi pasi ShBA-ja po planifikonte sulme hakmarrëse kundër militantëve të mbështetur nga Irani, të cilët nisën një sulm me dron në një postë të ShBA-së në Jordani muajin e kaluar që vrau tre ushtarë amerikanë.
