Dua Lipa ka bërë historinë pasi që arriti të rrëmbejë dy çmime Grammy natën e mbrëmshme.
Ajo ka fituar çmimin për “Artisten e re më të mirë” si dhe atë për “Këngën më të mirë për zhanrin Dance”.
23 vjeçarja u pa jashtëzakonisht e emocionuar kur e pranoi çmimin për “Artisten e re më të mirë”, një nga katër shpërblimet më të mëdha të natës.
Pasi e mori këtë çmim, Lipa pothuajse e përlotur tha se nuk di nga t’ia nisë fjalimin e saj.
“Dua ta nis duke thënë se jam shumë e nderuar që jam nominuar mes kaq shumë artisteve të mrekullueshme këtë vit – besoj se këtë vit kemi ecur përpara”, ka thënë ajo duke thumbuar kështu presidentin e Grammys, Neil Portnow, për deklaratën e tij të vitit të kaluar.
Ajo ka falënderuar fansat, familjen dhe ekipin e saj për gjithë mbështetjen që i kanë dhënë, transmeton Klan Kosova.
“Dua të falënderoj shumë fansat e mi që më kanë lejuar të jem versioni më i mirë i vetes time. Ju dua shumë”.
“Dua të falënderoj ekipin tim që kanë qenë krah meje – që kanë punuar shumë pa u lodhur asnjëherë dhe duke qenë gjithmonë afër meje”.
“Dua të falënderoj edhe familjen time që janë këtu sonte me mua. O Zot, jam shumë e nervozuar, e emocionuar dhe mirënjohëse”.
Vajza me prejardhje nga Kosova ka motivuar të gjithë ata që kanë një histori ndryshe se nuk duhet të heqin dorë nga ëndrrat e tyre duke thënë se ajo është një shembull i mirë për këtë.
“Dua të them se secili që nuk e ka kuptuar sa të veçantë janë që kanë një histori tjetër, një prejardhje tjetër, duhet ta dini që pavarësisht nga jeni, çfarë prejardhje keni ose në çka besoni – mos e lëni një gjë të tillë t’iu ndalojë t’i jetoni ëndrrat tuaja sepse ju e meritoni një gjë të tillë”.
“Unë jam një shembull që tregon se mund të bëni çdo që gjë e mendoni – faleminderit shumë”./ Klan Kosova
●●●
LHSHKRIMI NGA
L H
Editorial nga Klan Kosova — ndjek prive dhe zhvillimet e tjera kryesore të vendit.
