Finalja e CL: Inzaghi pret vuajtje, Enrique lojë të bukur

Mbrëmjen e sotme, në “Allianz Arena, do të zhvillohet finalja e madhe e Ligës së Kampionëve mes Interit dhe Parisit. Në këtë përballje, Interi do të synojë të çojë në katër numrin e trofeve më të vlefshëm evropianë, për dallim nga PSG-ja, e cila do të shpresojë që t’ia bëjë sefte. Simone Inzaghi ka pranuar se parisienët janë të fortë, dhe se do të kenë momente kur ekipi i tij do të vuajë. “Duhet të përballemi me Parisin duke ditur që do të ketë momente kur do të vuajmë, dhe të tjera kur do të kemi topin dhe ata do të duhet të mbrohen. Detajet dhe momentet janë çelësi. Duhet të dalim në fushë me dëshirë dhe vendosmëri për të fituar ndeshjen”. Ai foli edhe për rrugëtimin e vështirë që ka kaluar skuadra e tij deri në këtë pikë. “Kemi kaluar një rrugë të vështirë, duke përballur Cityn, Arsenalin, Bayernin dhe Barcelonën. Kemi arritur deri këtu dhe nuk duam të ndalemi. Interi gjithmonë luan ndeshje të mëdha, por kur është një finale, është ndryshe. E meritojmë të jemi këtu që nga ndeshja e parë në fushën e Cityt, por jemi një hap larg. Kemi kaluar gjithçka në Serie A, si gëzime ashtu edhe zhgënjime. Tani, detyra jonë është t’u japim një buzëqeshje të madhe tifozëve tanë. E gjithë Curva Nord do të jetë pas nesh”, u shpreh ai. Nga ana tjetër, Luis Enrique ka vlerësuar Interin si një skuadër të fortë në të dyja fazat e lojës. “Kur një skuadër tërhiqet në gjysmëfushën e vet, bëhet automatikisht shumë e vështirë sepse hapësirat janë të pakta dhe dendësia e madhe. Jemi mësuar të luajmë kundër skuadrave të tilla. Problemi është se Interi ka shumë lojtarë të mirë, si në mbrojtje ashtu edhe në sulm. Prandaj kanë arritur edhe finalen dy vite më parë. Duhet të përshtatemi në kohë reale, në varësi të mënyrës se si do të zhvillohet loja”. Trajneri spanjoll ndau edhe ndjesitë për ekipin e tij. “Kimia brenda skuadrës është po e njëjta që nga sezoni i kaluar. Kam një grup të jashtëzakonshëm dhe marrëdhënia ka qenë shumë e mirë që nga dita e parë. Nuk kam ndryshuar asgjë. Kam 10 vite më shumë eksperiencë se në finalen time të fundit të Ligës së Kampionëve. Kam punuar shumë gjatë këtyre viteve dhe përpiqem t’ia transmetoj ekipit gëzimin e të luajturit në një finale. Besoj se jemi gati, ashtu si edhe Interi. Do të bëjmë më të mirën për të zhvilluar një finale të bukur dhe, sigurisht, për ta fituar atë”, u shpreh Enrique. Finalen e madhe të Ligës së Kampionëve të sezonit 2024/25 do të keni mundësi ta ndiqni direkt në kanalet e platformës televizive Artmotion. /Klankosova.tv