Fillon turneu "Muzikë n’Teatër" nga Shpat Deda

E hëna e 5 dhjetorit u shënua me sallën e stërmbushur të Amfiteatrit të Teatrit Kombëtar të Kosovës në Prishtinë ku filloi turneu ‘Muzikë n’Teatër’ i kantautorit Shpat Deda. “Ishte një mbrëmje magjike me figura të spikatura të Kosovës në mesin e të pranishmëve e cila do të jehojë për një kohë të gjatë në kujtimet më të bukura të kryeqytetit”, thuhet në komunikatë. “Skena e hapur, audienca e hipnotizuar përreth saj, instrumentet e bukura muzikore dhe ndërveprimet magjepsëse në mes të tyre e shndërruan këtë performansë të Shpat Dedës, shoqëruar mjeshtërisht nga Visar Kuçi e Tomor Kuçi, në një koncert autorial që i prek nivelet më të larta artistike”. 12 këngët e performuara ishin një udhëtim ëndrrash për secilin të pranishëm, ku këngët e albumit ‘Rrugës’ nga Shpat Deda dhe disa nga hitet e tij të pavdekshme erdhën në një formë krejtësisht të re dhe të freskët për publikun kryeqytetas. Shpati, tanimë një kantautor i  kompletuar dhe i dëshmuar i skenës me mbi tridhjetë këngë origjinale të publikuara në tre albume përgjatë 15 viteve të fundit, shkëlqeu në një dritë të re ku vinte në shprehje përvoja e tij e gjatë në skenë, zotërimi i pakontestueshëm i saj dhe një pjekje e theksuar artistike. Ishte një mbrëmje ndryshe prej çka do që ka servuar skena e kryeqytetit në vitet e pasluftës, dhe një festë e origjinalitetit dhe virtuozitetit kryeqytetas nën lojën e këtyre tre artistëve të mahnitshëm, ndërsa dëshmia më e mirë për këtë janë duartrokitjet e pandalshme dhe brohoritjet frenetike të të pranishmëve. “Pas Prishtinës, turneu ‘Muzikë n’Teatër’ do të vazhdojë edhe në skenat teatrale të pesë qyteteve të ndryshme të Kosovës. Pas një koncerti të tillë në Prishtinë, një gjë është e sigurt: datat e këtij turneu assesi nuk bën të humben sepse muzika n’teatër është një magji që nuk harrohet”, thuhet më tej në njoftim. Datat e radhës së turneut ‘Muzikë n’Teatër’ janë si vijon: 6 DHJETOR - Teatri Adriana, Ferizaj 12 DHJETOR - Teatri i Qytetit 'Hadi Shehu’ (Pallati i Kulturës ‘Asim Vokshi’), Gjakovë 13 DHJETOR - Teatri i Qytetit 'Muharrem Qena’ (Qendra Kulturore ‘Rexhep Mitrovica), Mitrovicë 14 DHJETOR- Teatri i Qytetit, Vushtrri 16 DHJETOR - Teatri i Qytetit, Gjilan https://klankosova.tv/shpat-deda-nis-turneun-muzike-nteater-ne-disa-qytete-te-kosoves-video/?fbclid=IwAR0S4_PCuIdDnqD58MCDsCECc8WIthdeGl8Lh--O_zhzbYE1MURNOF-uobQ