Fevziu publikon përgjigjjet e patransmetuara të Thaçit në intervistën në Hagë - Çka tha për çështjen e presidentit?

Moderatori shqiptar, Blendi Fevziu ka publikuar përgjigjjet e patransmetuara të ish-presidentit të Kosovës, Hashim Thaçi gjatë intervistës së tij në Hagë. Sipas Fevziut, përgjigjjet ishin hequr nga transmetimi në emision për shkak se pyetjet ishin bërë në nëntor të vitit paraprak dhe ato nuk kishin relevancë kohore. Megjithatë, pas presionit të publikut ai tregon se vendosi t'i publikojë të dyja përgjigjjet e Thaçit. I pyetur nëse opozita duhej të bashkohej për të formuar qeverinë, ish-kreu i PDK-së ka deklaruar shkurtimisht në intervistë se: Nuk ka koment. Ndërsa në pyetjen tjetër, Fevziu kërkoi opinionin e Thaçit rreth bashkëpunimit eventual mes PDK-së dhe LVV-së për çështjen e presidentit, kurse ish-kryeministri i Kosovës tha se Kosova ka nevojë për konsensus më të gjerë politik. “Do të duhej të ndodhte një konsensus sa më i gjerë politik. Shoqëria jonë ka plot gra dhe burra të çmuar me dinjitet dhe integritet… Mendoj që ka ardhur koha që zgjedhja e presidentit të bëhet drejtpërdrejt nga qytetarët, përndryshe vazhdimisht do të ketë kriza qeveritare”, deklaroi ai. Thaçi tha se Kosova duhet të ketë ndryshime kushtetuese për zgjedhjen e presidentit direkt nga populli. “Kërkohen ndryshime kushtetuese, patjetër duhet të pajtohen edhe komunitetet. Kosova dhe Shqipëria janë vendet e fundit në rajon që presidentin e zgjedhin nga parlamenti”, u tha ai.