Lajmet e fundit
Deri në 10 vjet burg parashihen për ata që mbajnë armë në mënyrë kundërligjshme.
Kjo është e përcaktuar në Ligjin për Armët në Republikën e Kosovës, konkretisht në nenin 364 të Kapitullit 29, që trajton veprat penale që lidhen me armët, raporton Kiks Kosova.
Sipas këtij neni, kushdo që shet, këmben apo ndërmjetëson në mënyrë të paautorizuar armë, dënohet me gjobë prej 7 mijë e 500 euro deri në tetë vjet burgim.
Në rastet kur numri i armëve është më i madh se katër, apo kur sasia e municionit tejkalon 400 fishekë, dënimi mund të shkojë deri në 10 vjet burg.
Dënime nuk parashihen vetëm për personat që shesin armë, por edhe për ata që i posedojnë ato në mënyrë të kundërligjshme. Në këto raste, dënimi varion nga gjobë prej 7 mijë e 500 euro deri në pesë vjet burgim.
E njëjta gjë përcaktohet edhe në nenin 366, ku thuhet se nëse një qytetar posedon më shumë se katër armë dhe mbi 400 fishekë, ai dënohet me burgim prej dy deri në dhjetë vjet.
Ndërkohë, përdorimi i paautorizuar i armëve, veçanërisht gjatë festave, ka shkaktuar raste që kanë përfunduar edhe me humbje jete.
