Fermerët e Korishës në karantinë, qumështoret e Prizrenit mbesin keq pa qumësht

Banorët e karantinuar të fshatit Korishë i ka lënë keq qumështoret në Prizren. Qumështore “Sharri” për mungesën e furnizimit nga fermerët e Korishës i është drejtuar Odës së Afarizmit, njofton Klan Kosova. “Duke e marrë parasysh këtë OAK i është drejtuar menjëherë të premten me kërkesë kryetarit të komunës në mënyrë që të iu lejohet disa fermerëve të këtij fshati që ta dërgojnë qumështin e mbledhur në fabrikë, natyrisht duke i respektuar rregullat strikte të sigurisë dhe duke iu dhënë afat maksimal prej 2 orëve për realizmin e këtij veprimi”, ka thënë Oda. Propozimi i bërë që fermerët ta sjellin qumështin deri në hyrje të fshatit është i pamundur të funksionojë për arsye se qumështi duhet të dërgohet në fabrikë që t’i matet kualiteti i yndyrës, në bazë të secilës caktohet edhe çmimi i litrës së qumështit. Në këtë rast, matja e kualitetit larg fabrikës teknikisht është e pamundur. OAK konsideron që në këtë kohë është e domosdoshme që fabrikat të mund të funksionojnë normalisht, fermerët të bëjnë shitjen e qumështit dhe qytetarët të vazhdojnë të qëndrojnë në shtëpi duke u furnizuar me ushqime. OAK shpreson që Mytaher Haskuka do t’iu dalë në ndihmë qumështoreve, fermerëve dhe qytetarëve.