Federata e Basketbollit shpreh ngushëllime për vdekjen e Arben Fondaj

Federata e Basketbollit të Kosovës ka shprehur ngushëllime për ndarjen nga jeta të ish-basketbollistit, Arben Fondaj. Në telegramin e ngushëllimit, FBK thotë se Fondaj ka qenë i dalluar në basketboll, biznesmen i suksesshëm dhe familjar i përkushtuar. “Arbenin do ta kujtojmë me mall dhe do ta kujtojmë përgjithmonë. Ai do të mbetet gjithmonë në zemrat tona”, thuhet ndër të tjera në ngushëllimin e Federatës, transmeton Klankosova.tv. Telegram ngushëllimi E nderuara Familja Fondaj, I dashur komunitet i basketbollit, Me pikëllim të thellë kemi pranuar lajmin për ndarjen nga jeta të Arben Fondaj. Ai ishte basketbollist i Yllit, lojtar i Superligës në vitet e para të pasluftës. Fondaj ka qenë drejtor i klubit therandas, ish anëtar i Bordit të Federatës së Basketbollit të Kosovës në periudhën 2013 - 2016 në kohën e pranimit në FIBA, udhëheqës i delegacioneve të Kosovës në gara ndërkombëtare të kategorive të reja. Fondaj ka qenë i dalluar në basketboll, por biznesmen i suksesshëm dhe familjar i përkushtuar. Arbenin do ta kujtojmë me mall dhe do ta kujtojmë përgjithmonë. Ai do të mbetet gjithmonë në zemrat tona. Në emrin tim personal dhe të Federatës së Basketbollit të Kosovës dua të shpreh ngushëllimet më të sinqerta për familjen Fondaj dhe gjithë komunitetin e basketbollit. Me Respekt, Arben Fetahu, Kryetar i FBK-së