Familjes myslimane nga Britania, i ndalohet shkuarja në Disney Land

Një kryefamiljar mysliman nga Britania e Madhe, ka treguar se si pushimet që kishte planifikuar t’i kalonte në Amerikë, ishin prishur për shkak se atij dhe familjes i është mohuar e drejta të fluturojnë për në SHBA për shkak se janë myslimanë. Mohammad Tariq Mahmood 41 vjeçar, vëllai i tij dhe fëmijët e tyre të moshës 18 dhe 19 vjeçare, thanë se ishin ndaluar në portën e kalimit në aeroportin Gatwick ku u tha se vizat e tyre për të udhëtuar për në Amerikë u janë tërhequr. Ata po thonë se autoritetet britanike s’ua dhanë asnjë shpjegim se pse vizat e tyre, të marra 6 javë para fluturimit, papritmas ishin anuluar në minutën e fundit. Nga ky anulim atyre u kanë humbur 11,000 dollarë që kishin shpenzuar për rezervimet e këtij udhëtimi. Kjo ndalesë ka ardhur pasi që kandidati republikan për president të Amerikës Donald Trump, tha se të gjithë myslimanëve duhet tu ndalohet hyrja në SHBA. Mahmood i cili është nga veri-perëndimi i Londrës, i ka bërë thirrje kryeministrit britanik që të marrë një shpjegim nga autoritetet amerikane se pse ndodhi një gjë e tillë dhe ai tërë kohën po bën përpjeke që paratë e biletave për në Los Angeles t’i kthehen. Familja është detyruar që të largohet nga aeroporti teksa fëmijët e tyre po qanin. “Ne kemi 5 muaj që po e planifikojmë udhëtimin. Fëmijët e mi po i numëronin ditët në telefonat e tyre deri te shkuarja në Amerikë”, ka thënë Mahmood, shkruan Daily Mail, transmeton Klan Kosova.