Evropa tani ka aq shumë gaz natyror sa nuk di çfarë të bëjë me të

Evropa ka aq shumë gaz natyror sa që nuk di se çfarë të bëjë me të. Aq shumë, në fakt, sa çmimet  shkuan fare poshtë në fillim të kësaj jave. Për muaj të tërë, zyrtarët kanë paralajmëruar për një krizë energjetike këtë dimër pasi Rusia – dikur furnizuesi më i madh – shkurtoi furnizimet në shenjë hakmarrjeje për sanksionet e vendosura nga Evropa për pushtimin e saj në Ukrainë. Tani, objektet e depozitimit të gazit të BE-së janë gati plot, cisternat që transportojnë gaz natyror të lëngshëm janë rreshtuar nëpër porte, në pamundësi për të shkarkuar ngarkesat e tyre, dhe çmimet vazhdimisht po bien. Çmimi i gazit ka rënë me 20% që nga e enjtja e kaluar dhe me më shumë se 70% që kur arriti një rekord të lartë në fund të gushtit. Të hënën, çmimet holandeze të gazit për dërgesë brenda një ore – të cilat pasqyrojnë kushtet e tregut evropian në kohë reale – ranë në 0 euro, sipas të dhënave nga Exchange Intercontinental. Çmimet ranë dukshëm për shkak të një "rrjeti të mbifurnizuar", tha për CNN Business Tomas Marzec-Manser, kreu i analitikës së gazit në Independent Commodity Intelligence Services, raporton KlanKosova.tv. Është një kthesë jashtëzakonisht befasuese e ngjarjeve për Evropën, ku familjet dhe bizneset janë mbytur nga rritjet e jashtëzakonshme të çmimit të një prej burimeve të saj më të rëndësishme të energjisë gjatë vitit të kaluar.