Evakuohen banorët, flakët e zjarreve "nuk dorëzohen'' në Finiq

Vatrat e zjarrit kanë mbajtur në alarm ekipet e zjarrfikësve, emergjencave civile, pushtetit lokal dhe vullnetarëve në zonën e Finiqit në jug të vendit. Përpjekjet e qindra forcave nga toka dhe nga ajri të avionëve Canadair dhe helikopterit, nuk kanë vënë dot nën kontroll të plotë vatrat e zjarrit, të cilat kanë vijuar edhe gjatë natës në këtë zonë. Për këtë arsye gjatë natës janë realizuar evakuime të pjesshme të banorëve, ndërsa perimetri i zjarrit është mbajtur larg banesave dhe bizneseve, raporton A2CNN, transmeton Klankosova.tv. Gjithashtu, dhjetëra forca kanë parandaluar përhapjen e flakëve edhe drejt hidrocentralit të Bistricës. Ndërhyrjet nga ajri në këtë zonë pritet të rifillojnë gjatë paradites së të dielës. Për arsye sigurie, qarkullimi i mjeteve në aksin Muzinë - Bistricë do të vijojë të mbetet i kufizuar deri në përmbyllje të operacioneve.