Lajmet e fundit
Eshtrat e poetit dhe fituesit të çmimit Nobel për Letërsinë, kilianit Pablo Neruda, i cili u zhvarros në vitin 2013 për të përcaktuar nëse shkaku i vdekjes së tij erdhi nga agjentët e diktaturës së Augusto Pinoçetit, u vendosën në kopshtin e vilës së tij.
Pas një ceremonie përkujtimore me një pjesëmarrje të pazakontë në Santiago, arkivoli me eshtrat e ambasadorit të letërsisë hispaniko-amerikane u transferua mëngjesin e sotëm në Isla Negra rreth 120 kilometra në perëndim të kryeqytetit, vendbanimi i fundit i poetit.
Pothuajse 43 vite pas vdekjes së tij në 1973, Pablo Neruda prehet sërish në kopshtin e vilës përballë Paqësorit, në krah të Matilde Urrutia, bashkëshortes së tij të tretë.
Pas një beteje të gjatë gjyqësore, zhvarrosja e eshtrave të Pablo Nerudës u krye në prill të vitit 2013 në përpjekje për të hedhur dritë mbi rrethanat e vdekjes së tij. Ekspertiza për momentin nuk ka dhënë një përgjigje përfundimtare./botimeshqip/
