Elshani jep detaje për armatimin që iu gjet Arsenijeviqit: Sasia konsiderohet e rrezikshme

Të dielën e 22 qershorit një sasi e madhe e armatimit u kap në Vallaq të Zveçanit. Arsenali i armëve u gjet brenda një objekti që i përket politikanit serb, Aleksandar Arsenijeviq. Kështu pati deklaruar ministri i Brendshëm në detyrë, Xhelal Sveçla, transmeton Klankosova.tv. Sipas policisë, armët, municioni, granatat e dorës dhe zollat ishin gjetur në dy gypa të plastikës të vendosur nën tokë. Lidhur me këtë, në emisionin “Kosova Today”, zëvendësdrejtori i policisë për rajonin e veriut, Veton Elshani tha se Arsenijeviq nuk ndodhet në Kosovë, por që sipas tij sapo të hyjë në territorin e vendit, do të ndalohet. “Ne kemi vepruar menjëherë pasi nuk kemi pasur mundësi me prit për kohën, sepse është delikate, sidomos për veriun. Nëse kemi informacion që ne e konsiderojmë që mund të jetë i arsyeshëm dhe me dyshim të bazuar, ne reagojmë. Kemi shku, e kemi gjetur armatimin që edhe e keni pa, edhe për neve tani është një person që është me interes për t’u intervistuar. Nuk e kemi arrestuar askënd". “Sipas informacioneve që kemi ai nuk është në Kosovë, sidoqoftë në momentin e parë që do të jetë në kufi ose do të lajmërohet tek ne, i njëjti do të ndalohet, do të intervistohet e mandej varet nga Prokuroria për veprime të mëtejshme”, u shpreh Elshani. Ndër të tjera, Elshani tha se Krimet e Rënda në Prishtinë po merret me rastin. Elshani po ashtu tha se sasia e gjetur e armatimit konsiderohet si e rrezikshme. https://www.youtube.com/watch?v=JS2D-IClmYc