Mbi 200 venezuelianë që u deportuan nga Shtetet e Bashkuara me akuza për anëtarësim në bandat kriminale në fillim të këtij viti dhe u mbajtën të ndaluar në një burg në El Salvador, u kthyen në shtëpi në Karakas të premten.
Lirimi ishte pjesë e një shkëmbimi të koordinuar të të burgosurve, ku 10 amerikanë të mbajtur në Venezuelë u kthyen në Shtetet e Bashkuara, thanë zyrtarë nga të tre vendet.
Në një postim në X, presidenti i El Salvadorit, Nayib Bukele, tha se amerikanët ishin në rrugë për në El Salvador nga ku do të vazhdonin "udhëtimin e tyre për në shtëpi".
Ndërsa sekretari i Shtetit i ShBA-së, Marco Rubio, konfirmoi lirimin e "dhjetë amerikanëve që u ndaluan në Venezuelë". Ai e falënderoi Bukele për ndihmën e tij në sigurimin e marrëveshjes.
Qeveria e Venezuelës tha se 252 venezuelianë të mbajtur në El Salvador ishin liruar. Presidenti Nicolas Maduro festoi mbërritjen e dy aeroplanëve që i transportonin ata pranë Karakasit të premten në mbrëmje.
Venezuelianët u dërguan në El Salvador nga Shtetet e Bashkuara në mars, pasi presidenti i ShBA-së Donald Trump thirri Aktin e Armiqve të Huaj të vitit 1798 për të deportuar me shpejtësi anëtarët e dyshuar të bandës “Tren de Aragua” pa kaluar nëpër procedurat normale të imigracionit. Ata u mbajtën në burgun famëkeq të sigurisë maksimale CECOT të El Salvadorit.
Deportimet shkaktuan kritika të ashpra nga grupet e të drejtave të njeriut dhe një betejë ligjore me administratën Trump për akuzat se nuk u ndoq procesi i rregullt ligjor, shkruan Reuters, transmeton Klankosova.
●●●
LGSHKRIMI NGA
L. Ga.
Editorial nga Klan Kosova — ndjek lajme dhe zhvillimet e tjera kryesore të vendit.
